Інспекцыйна-надглядныя комплексы

Інспекцыйна-надглядны комплекс - гэта сістэма, якая выкарыстоўваецца для ажыццяўлення інтраскапіі пры мытным кантролі буйнагабарытных грузаў і тэхнікі. Падобныя механізмы дапамагаюць абслугоўваць вялікую колькасць транспартных сродкаў і накіраваны на вызначэнне змесціва аўтамабіля, тыпу грузаў, унутраных прылад, рэчываў і прадметаў.

 

Інспекцыйна-надглядныя комплексы станоўча зарэкамендавалі сябе ў рэгіёне дзейнасці мытні. Прымяненне тэхналогіі дае магчымасць павялічыць прапускную здольнасць пунктаў пропуску за кошт скарачэння часу правядзення мытнага кантролю да 10-15 хвілін (тады як ручны надгляд можа займаць некалькі гадзін). Выкарыстанне метаду «неінтрузіўнага» надгляду дазваляе і выявіць схаваныя ў тайніках прадметы.

 

Выкарыстанне інспекцыйна-надглядных комплексаў на пунктах мытнага пропуску садзейнічае: развіццю гандлю ў краіне, паскарэнню тавараабароту і пашырэнню знешнегандлёвых сувязей; напаўненню даходнай часткі бюджэту Рэспублікі Беларусь; змяншэнню патэнцыйных пагроз дзяржаве, выкліканых перамяшчэннем забароненых тавараў.

 

У Брэсце пабудаваны першы ў Беларусі інспекцыйна-надглядны комплекс, прызначаны для агляду грузавых чыгуначных саставаў. Будаўніцтва ІДК у раёне парка "Зарэчыца" станцыі "Брэст-Паўночны" ажыццёўлена ў рамках міжурадавага пагаднення Рэспублікі Беларусь і Кітайскай Народнай Рэспублікі.